Nukissiuutinik atuinerit allanngungaarsimanngillat
2024-mi nukissiuutinik atuineq 9.966 TJ-usimavoq 2023-mi nukissiuutinik atuinermut sanilliullugu 0,1 pct.-imik appasinneruvoq, 2023-mi nukissiuutinik atuineq 9.976 TJ-usimalluni. Nunap iluanit olianik atuineq tamakkiisumik 0,4 pct.-imik apparsimavoq. Piujuaannartumik nukissiuutinik atuineq 2024-mi 1,5 pct.-imik qaffassimavoq.
Silap pissusaa tunngavigalugu nukissiuutinit atukkanik iluarsiineq 1,8 pct.-imik qaffassimavoq
Nukissiuutinik atuiniviit saniatigut silap pissusaa tunngavigalugu nukissiuutinit atukkanit iluarsiinerit Naatsorsueqqissaartarfimmit aamma suliarineqarput, Silap pissusaa nalinginnaasumit allaanerusimagaangat silap pissusaa nalinginnaasoq tunngavigalugu nukissiuutinit atukkanik iluarsiisoqartarpoq. Taamaasilluni ineriartornermi allannguutit ersersinneqartarlutik. 2024-mi silap pissusaa tunngavigalugu nukissiuutinik atuineq 10.257 TJ-usimavoq, 2023-mut sanilliullugu 1,8 pct.-inik annertunerulluni.
Nukissiuutiliorneq pingaarneq aamma nammineq pilersorneq annertusivoq
2024-mi Kalaallit Nunaanni nukissiuutiliorneq 1.826 TJ-usimavoq, 1,1 pct.-imik annertusisimalluni. Nukissiuutiliorneq annerpaaq erngup nukinga atorlugu aamma eqqakkanit pisarpoq. Kalaallit Nunaanni nammineq pilersorneq 17,9 pct.-imut qaffassimavoq ukioq sioqqullugu 17,6 pct.-iusimasoq. 2024-mi nukissiuutiliornerup pingaarnerup a aamma nammeneq pilersornerup annertusisimaneri, Kalaallit Nunaanni nukissiuutiliornernit atuinerup annertusisimanera pissutaavoq. Avataani ikummatissanik atuinerup annikinnerusimanera pissutaalluni nukissiuutinit nammineq pilersuinermit atuinermut sanilliussinermi 2024-mi nukissiuutinit nammineq pilersuinermut atuineq qaffasinnerulersimavoq.
Innaallagiamik pilersuineq annerpaaq nukissiuutinit ataavartunit pisarpoq
2024-mi Nukissiorfiit innaallagiamik tunisassiornera annerpaataa, tassa 82,5 pct.-ia imermik nukissiornermit pivoq. Nukissiorfiit katillugit 2.124 TJ-mik innaallagissamik tunisassiorsimavoq.
Drivhusgassinik aniatitsineq apparsimavoq
Nukissiuutinit atuinernit drivhusgassinik silaannarmik mingutsitsineq tamarmiusoq 2024-mi 0,4 pct.-imik apparsimavoq, 606.659 ton CO2-ækvivalentiulluni. 1990-imut sanilliullugu 2024-mi silaannarmik mingutsitsineq 2,9 pct.-imik appasinneruvoq.